10.4.04

一切從梁氏 T2-KT88D-11開始...

果朝早我如常係 office 蛇仔上左音響網站 Review33,睇到有關祖國製膽機既討論,有人話梁氏出品既膽機質素不俗,售價仲比一套迷你hi-fi 低,「千零蚊,買番黎聽過絕對係抵!」所以就膽粗粗落左柯打。T2-KT88D-11 係一部膽整流 AB1 類推挽機,兩支 6N11、兩支 6N6、四支 KT88、兩支 5Z3P,仲加左三極同超線性選擇制,都只係加多四呀蚊。揀 KT88 推挽,貪佢夠大力,因為之前用開既 Musical Fidelity A2 唔多夠力水,聽 rock (係呀,我係 rock 友黎架!) 唔夠力,每次聽 Pink Floyd 既《Dark Side Of The Moon》就會好『炆』, 對用緊既 Dali 皇太子欠控制力,高音好燥,扭大聲 volume 成份聲一舊舊,好辛苦。

點解要膽整流?因為『膽』囉,膽機膽機,多 d 膽梗係開心 d 啦!話說我係上網同 d 網友交流左之後決定買呢部機,同一時間另一個網友又咁岩訂同一型號、同一 config 既機,咁岩我地又住係同一區、仲同姓添,咁呢間武漢既小廠竟然擺左個烏龍,當左我係佢、佢係我!淨係寄左一部機落黎俾佢,我就無份,真係取脹。不過話時話,呢間梁氏既服務真係好好,跟 d 柯打跟得好貼,email 必覆,送貨又快,講到售後服務就真係 120 分!香港既膽機真係要學下人地,平又平過你,服務又好過你。

2004 年 3月尾收到部機,聽左唔夠一個月就出事!有一日開機 warm up 後兩隻喇叭突然傳出 woo 聲,聽真仲有失真,高頻拆左,於是四出上網問究竟啦,又 email 問梁氏果邊,兩日後就收到佢地 send 黎既一對整流膽,話叫我試下係咪呢 part 出事,「唔係」,兩日後再收到四支 KT88,「都唔係」,結果佢地 email 黎講「我地寄過部新既落黎,搞到你無機聽真係過意唔去」之類既說話,你話丫,今時今日呢 d 先係「服務」嘛!而家聽近既已經係第二部,第一部去左邊?準備拖番上去深圳寄番俾佢囉。

就係因為呢部梁氏,我係 Review33 既網上面識到幾位同樣用緊佢既用家,每日返工例必上去吹水交流下摩機心得。最初乜都唔識,日日上去問,「6N11、6N6、5Z3P 有無代替品;邊隻排子既 KT88 好聲又抵用;交連電容有咩選擇...」總之乜七都問一餐,問下問下,變左好熟,其中 Simon 兄更是經驗豐富兼好人到極既發燒人士,幫手係大陸訂膽、訂電容義不容辭,又借埋自己既私火出黎俾人試,竟然俾我識到 d 咁好既人,真係呢......亦係因為買左呢部膽機,我係中華業餘無線電研究會報讀左初級電子實習班,同埋會一路讀落去,一定要學識自己砌膽機!