17.12.04

細Output

EL84 單端三極,每聲道輸出最大得唔夠 2W,但係夾靈敏度有 94db 既 Heresy 出黎既聲實在令人欣喜。

以前去添置、德發聽好多舖頭既聲都覺得幾好,但係最近再去果 d 以前認為靚聲既舖頭再聽,咦,開始分辨到邊 d 仲係自己部機去唔到既水準、邊 d 係唔得既 setup。同埋發覺多數大火數膽機加現代喇叭出黎既聲都係唔係自己杯茶,反而賣古懂細 d 火數既單端夾 d 陳年衣櫃咁大既喇叭出黎既聲就會令自己好沉醉。

VT52.com台灣 Collin 兩位高手既作品,都會係小弟未來 DIY 所參考既對象。

30.11.04

唔再搞喇

再試左將交連由 Jensen 0.47uF 改為 VQ 0.22uF,d 低頻快番 d 同實左少少,人聲多左 d d sexy 味,但係 VQ 既高頻去得唔夠盡,最候係用 Jensen 既 0.22,好滿意。驅動級試過半支 12ax7,低頻好豐滿,但頻寬唔夠;並聯 12ax7 效果亦唔好;並聯 12at7,味道始終唔夠半支咁通,結果係用每邊用半支 12at7,一支做晒兩個 channel,另一個細膽窿位只係插支後備膽,無接線。

最後大功告成,部 amp 連埋對 Dali 皇太子送左俾老竇,自己就用番部 Motorola EL84 單端。


13.11.04

工作點

今日係公司跟住呢度 (http://www.diyzone.net/article.php?sid=342) 畫左 KT88 單端既工作點,如下。因為搵唔到 EL34 三極既 characteric graph,另外而家聽落 KT88 又好聲 d ,所以就用佢黎試畫。 而家 KT88 既 Rk = 470R,所以先畫左錄色果條,發覺同最大屏耗差太遠,而家諗住用 Rk = 200R,偏壓 -25V,Primary 由 3.5K 改番做 2.5K,Va-k = 310V,如果 input 擺幅 -45 至 -5V,咁 KT88 每支最大屏流咪有 180mA,嘩,咁我個 choke 得 200mA,唔夠用又要買?! 另外亦唔改得 GZ32,因為佢最大只承受到 300mA,暫時要用番 5U4GB。

8.11.04

心理歷程

點講呢?我年初買左部大陸梁氏 KT88 推挽,最初都 okay 架,聽聽又覺得呢度唔妥、果度唔妥,跟住上網問其他仁兄,然後識到一班梁氏用家,人地話線路版唔好聲,要改搭棚,咁又心癢難耐,卒之改左。果次係第一次摩機,好多野都唔識,好在得網友 simon 哥幫忙,一部一部做,結果又出到聲窩。

係果個過程中周圍上網睇左好多膽機理論,再周圍問人,又去左中無上左初級電學,拉拉雜雜,開始逐步了解入面既原理。然後部搭棚推挽又聽左一排,都唔係唔好,但係 d 聲硬係唔夠開,又睇 d 人話單端既聲好正,咁又心癢癢想要單端。先先係係 eBay bid 左對比較高靈敏度既 Klipsch Heresy,為日後單端舖路,跟住就係 eBay bid 左部 cheap cheap Motorola EL84 單端,返到黎先改左做三極,set 番岩 d 電壓後開聲,雖然入面既 part 屎唔係咩靚料,但係出到黎既聲已經令我覺得部推挽無前途。之後... 咪將佢解左體,做左而家呢部野囉。

其實原本係計劃左整部 2A3 先既,線路同牛呀、choke 呀都有齊,但係覺得自己未夠料,驚徙左 d 靚牛 (d 牛都係國產既姐,但係貴過寶記少少),所以咪諗住先用手頭上既物資整部 EL34 / KT88 單端黎蘑練下 d 技術囉。

至於經驗呢... 我真係無乜,最初覺得線路圖好難睇,但係整落又無想像中咁難。其實初學者最驚就係踏出第一部,洗濕左個頭之後 d 野就會越黎越上手,反而我覺得應該搞通每個環節既原理,睇多 d 理論,咁 DIY 上黎就會更架得心應手。

仲有就係多 d 上網發問,唔明問到佢明、睇到佢明,咁囉。

7.11.04

開聲喇!

星期五晚兩點完工,一開聲,同上次梁氏改搭棚一樣,一邊無聲,頭先進行 debug:


最後發現係個 volume 制度條屏敝線出面層衣同條芯 short 埋左,哈哈 ~~


Check 埋 d 電壓,同線路圖低左幾十 V,慮波後 B+ 原本應該 380V,我得 320V,我諗係個 choke 用大左,不過唔理住,照聽!


每邊行 1/2 支 12AT7,用 EL34 聽左陣,中高好好,低頻就削 d,而家試緊 KT88,感覺良好 ~~

用佢黎睇下 Queen 既 live 先

4.11.04

焊接、再焊接!

當時部 KT88 推挽改搭棚整左兩個禮拜,點知拆佢淨係用左幾個字,呢 d 係剩餘物資...


呢部就快搞起,單端確係易砌好多!


Simon 建議唔好用 12at7 行頭,但係手頭上淨係得佢,12ax7 未寄到黎,所以應該會用 at7,屏極電阻改左做 36K...

31.10.04

終於鑽晒窿

今晚開左少少工,上晒 d 牛:


仲焊左地棚同大膽燈絲:


寶記牛牛都幾好樣丫,size 亦適中:


前面...


上埋 d 膽睇下果樣先...


都唔太差丫...

28.10.04

寶記牛牛

今日又去左寶記買埋電源牛同 choke,老細好好人呀,畫埋圖教我牛牛既原理同駁法,仲教我點搭棚添,令我對寶記呢個本地品牌有好感呀。

呢個電源牛:

一般單端機夠晒用:


呢個 choke 仔:

25.10.04

EL34 三極單端開工

買左個殼,有工開喇!不過唔係二A三,而係EL卅四,用本地寶記 standard 輸出牛,電源牛同 choke 仲未有.... 仲未焊得野,因為個殼要鑽返岩 d 窿,未有電鑽,都幾頭痕,買左 IEC 插座窿位又差少少,喇叭線頭又擰唔實,唉... 先用 d 平料整 EL34,從中羅番 d 經驗,再整 2A3 既時候希望唔駛踩咁多屎,嘻!


今晚淨係上左個 Fuse 座同兩隻細膽座:

23.9.04

單端中毒


Klipsch Heresy 係睇 Audio Asylum 認識既,當時上去搵 d 單端機岩夾既喇叭,好多人都讚 Heresy 既聲好開揚,而且二手價合理,再加埋佢有 horn,大 horn 我屋企就唔夠地方玩唔到,但
呢對 12" 都有 horn,size 雖然細左 d,但係都叫做有丫,咁岩又係 eBay ....

早就看過張八點 (http://home.pchome.com.tw/computer/ma3c/8-point.htm),但一直對當中提到推挽機及負回輸的缺點並不太著意:
「...... 我以前裝過許多擴大機,有單端的,也有推挽的。根據我實際的經驗,如果推挽擴大機不加負回授的話,聲音就會粗,因此一定要加上些負回授,聲音才會細。但是我裝的單端擴大機,即使不加負回授,聲音還是很細緻,這就代表了推挽擴大機一定有不對勁的地方。」
「...... 內行的人都知道,負回授也有負作用,會造成時間延遲的現象,因為負回授是把已經放大過的輸出訊號一部份,回送到輸入端去,因此會造成時間延遲的問題,因此負回授的聲音總會比較霧,聲音不自然,也就是說,聲音比較呆,以及聲音不夠鮮活。」

我仲將梁氏既負回輸加大,因為確如張先生所講,加了負回輸既推挽機音色更細膩,而頻率響應亦得以廣闊。調大了負回輸之後亦滿足左一段時間,因為 d 聲確係幼細左好多...... 直至,部 eBay bid 返來既 tune 好之後開聲果下......

呢部係 Motorola 既 console amp 外表就真係衰到爆,我初初都覺得賴左野。其實佢係分左兩份,一邊係 stereo,12AX7 推左、右單端五極 EL84,另一邊係推挽,上一手將 stereo 果邊既 12AX7 改左做 6922,五極亦改左做三極。

我亦只係用佢 stereo 果份,一返到黎 d 開機,有聲但係唔大,心諗 EL84 三極係咁上下卦。跟住 check 佢 d 電壓,EL84 既屏壓就 okay,但係 6922 既屏壓得 40V,唔係卦...... 改返上 85V 倒之後又駁錯左粒屏極負載電阻之後既 bypass cap,搞到一 d 聲都無,咁先知道負載電阻既用途同駁法。一切正常後開聲,嘩,volume 扭到一半已經夠聽,同梁氏扭到一半 volume 既聲差唔多 (因此我就懷疑梁氏前面兩級既線路有問題,因為唔係我一個覺得梁氏細聲)。

好喇,坐定定聽歌仔,初初都唔覺部機有乜特別,只係覺得聲低唔同姐,呢部既聲開揚 d,低頻瘦少少,但係彈力又好過梁氏。但係聽聽下就覺得黎料,乜 detail 多左咁多既?低頻瘦得黎又岩岩 fit 對 Heresy 播 (對 Heresy 既分音器摩過,改細左高中音單元既 output,因為原本佢既低頻實在太少),而且 d 彈力...... 相比之下梁氏低頻朦好多,有 d recording 既 bass drum 會唔太聽到,但用部 EL84 就出返晒黎。之前以為人地講既 detail 多即係話高頻兼會刺耳,但係聽到 EL84 既聲先知係錯。部機出黎既聲完全唔會刺耳,亦唔會覺得高頻「多」左,但係明顯「通透」左,最覺就係聽小提琴,梁氏摩極 d 小提琴聲都唔自然,而呢部 d violin 就聽得下喇,聽到 d 擦弦感真係精神為之一陣,John Coltrane 既 saxphone 亦更加令人著迷。整體感覺係好似揭開左層紗咁...... 唔同呢 d 就係單端既魅力所在?

我諗靚既推挽機都可以好正,但係呢排我真係俾單端迷倒。

其中一點係單端線路比起推挽簡單好多,part 屎少。推挽機訊號要經多好多野,令到我心理上覺得好唔舒服,所以呢排梁氏已經無開著過,我諗都唔會再著番,因為我決定要拆佢骨,Jensen 交連用得番、水塘用得番、RMG 電阻用得番、DZ 級間 volume 用得番,6dj8 同 EL34、KT88 膽可以愛黎砌過部單端,電源牛同 choke 可以留番日後用,唯一唔會再用既係對輸出牛,浪費極有限啦。

仲有,以前換左 d 靚少少既線音質有所改善,但係部 EL84 用紅白線已經好正,第時我寧願用 d 錢係第度 lu。

本來下一個 project 係砌 2A3,牛同 choke 都到左,但係近排又好想用梁氏既物資黎搞部 EL34 SE 先,唔知點解,可能我既習慣係好野留番最尾先食啦,亦已經買左對寶山既單端牛,得就留番自己聽,唔得就俾老豆,嘻,係咪好孝順呢我?!

15.7.04

發燒?

我自問真係唔太燒,如果燒都係燒係好想好想知呢 d 機背後既原理,所以呢排勁睇果 d 原理文獻,其中 呢個洋人網 寫得好好,所以已經 print 晒有關既文出黎,每日帶住係袋,晏晝食飯就拎埋出去刨,再加埋中無既原理班,希望早日可以明白自己砌緊 d 乜。

其實聽歌呢家野小學已經開始架喇,當時屋企環境唔好,屋企淨係得部 National 手提卡色機,聽 Cassette 帶同收音機已經好開心,好鍾意當年商業二台周美茵主持既《American Top 40》,好鐘意歐西流行曲,勁聽 Culture Club、Spandau Ballet、Duran Duran、Bros、Bananarama、Michael Jackson、Petshop Boys、Depeche Mode,香港既偶像就有譚詠麟,〈愛情陷阱〉簡直係校歌。跟住興 band sound,就勁迷 Beyond、太極、小島、達明、浮世繪,老豆亦係當時買左一套 Technics 既套裝 hi-fi,有埋唱盤,之後既日子就以買碟為樂,與同學交換唱片亦係賞心樂事。一次去到某同學屋企聽黑膠,發覺係佢屋企聽出黎既聲點解靚過自己屋企咁多既?用一部有埋收音機既日本 amp、一對 AR 喇叭,點解仲好聲個自己屋企既套裝既?然後發現鴨寮街,發現幾舊水就可以買到部二手既同款日本amp,中五暑期工出糧後就買左部 Sansui 連收音機既 Receiver Amp,依家部amp 仲有用緊呀。潮流興夾Band聽 band sound,自然又學左彈結他,d 師兄教落,膽 amp 靚聲果粒 amp,出名既結他手個個都係用膽 amp 架,當然我又聽左師兄講買左部膽 amp,當時有朋友係曾福琴行做,有特價。而家部機亦都用緊,但係有 hum 聲,呢個亦係我去學電子原理、砌膽機既其中一個原因,我想識整結他 amp,可以修理番自己部結他 amp,甚至砌部屬於自己既 guitar amp。

之後 CD 興起,黑膠自然少聽左,掛住夾 band, 無錢同無時間玩音響,歌就當然聽好多。直到 今年,band 停左,個心又痕番,正式投入時間研 夠下膽機。呀,其實岩岩讀完書出黎果時, 大概十年前,都係廣州海印買左台 6L6 膽 機同一對惠普既座地喇叭,部 6L6 之後嫌 唔好聲,拎左去 band 房,跟住燒埋牛, 報銷左;對惠普就一直用到舊年同朋友買 左對 Dali Royal Menuet 之後先俾左 老豆用。當時覺得國產既膽機唔夠班,估唔到而家 又買左部,不過呢十年八年國產既音響文化真係進步左咁多,好多排子已經係國外打出名堂,被淘汰既當然亦唔會少啦,我仲記得當年天琴既膽機係國內名牌,而家已經無左影,又或者已經進化左做第 d 牌子啦。

CD 革命以前一直唔覺得有需要買部獨立既 CD 機,朋友講 CD 機靚聲過 DVD 機,我就同佢講:多餘啦,我都聽唔出 。所以當年第一台 play 得 CD 既機器就係 Sony 既 LD 機,壞左,換左部 909,因為仲要睇 LD,一直用到而家。最近耳仔好似被人毒到靈敏左,有真係覺得唔太好聲,部 cheap cheap 二手 Technics 盤都仲好聲過佢,又心癢癢想買台CD 機。

自己搵錢唔多,而且阿媽教落要節檢,所以買每一樣野都要度得好清楚,所以一直未卜槌 買邊部。咁岩係呢個時候睇到報紙話年底 SACD 機會大 跌價,唔駛二千蚊就會有部,咁老死都等啦,我好孤寒架!呢段時間,諗住平平地買部 DAC-AH 玩住先,聽日就出鴨記買,八舊幾,蝕極有限。 另一方面,最近得到網友 Simon 既啟蒙,小弟完成左將部 KT88 改為搭棚線路,其實靚聲都係其次,學識睇線路圖先係今次改機功課既主旨,踏出左呢一步,以後就肯定更精采好玩。人生,都係求好玩既姐~~

10.4.04

一切從梁氏 T2-KT88D-11開始...

果朝早我如常係 office 蛇仔上左音響網站 Review33,睇到有關祖國製膽機既討論,有人話梁氏出品既膽機質素不俗,售價仲比一套迷你hi-fi 低,「千零蚊,買番黎聽過絕對係抵!」所以就膽粗粗落左柯打。T2-KT88D-11 係一部膽整流 AB1 類推挽機,兩支 6N11、兩支 6N6、四支 KT88、兩支 5Z3P,仲加左三極同超線性選擇制,都只係加多四呀蚊。揀 KT88 推挽,貪佢夠大力,因為之前用開既 Musical Fidelity A2 唔多夠力水,聽 rock (係呀,我係 rock 友黎架!) 唔夠力,每次聽 Pink Floyd 既《Dark Side Of The Moon》就會好『炆』, 對用緊既 Dali 皇太子欠控制力,高音好燥,扭大聲 volume 成份聲一舊舊,好辛苦。

點解要膽整流?因為『膽』囉,膽機膽機,多 d 膽梗係開心 d 啦!話說我係上網同 d 網友交流左之後決定買呢部機,同一時間另一個網友又咁岩訂同一型號、同一 config 既機,咁岩我地又住係同一區、仲同姓添,咁呢間武漢既小廠竟然擺左個烏龍,當左我係佢、佢係我!淨係寄左一部機落黎俾佢,我就無份,真係取脹。不過話時話,呢間梁氏既服務真係好好,跟 d 柯打跟得好貼,email 必覆,送貨又快,講到售後服務就真係 120 分!香港既膽機真係要學下人地,平又平過你,服務又好過你。

2004 年 3月尾收到部機,聽左唔夠一個月就出事!有一日開機 warm up 後兩隻喇叭突然傳出 woo 聲,聽真仲有失真,高頻拆左,於是四出上網問究竟啦,又 email 問梁氏果邊,兩日後就收到佢地 send 黎既一對整流膽,話叫我試下係咪呢 part 出事,「唔係」,兩日後再收到四支 KT88,「都唔係」,結果佢地 email 黎講「我地寄過部新既落黎,搞到你無機聽真係過意唔去」之類既說話,你話丫,今時今日呢 d 先係「服務」嘛!而家聽近既已經係第二部,第一部去左邊?準備拖番上去深圳寄番俾佢囉。

就係因為呢部梁氏,我係 Review33 既網上面識到幾位同樣用緊佢既用家,每日返工例必上去吹水交流下摩機心得。最初乜都唔識,日日上去問,「6N11、6N6、5Z3P 有無代替品;邊隻排子既 KT88 好聲又抵用;交連電容有咩選擇...」總之乜七都問一餐,問下問下,變左好熟,其中 Simon 兄更是經驗豐富兼好人到極既發燒人士,幫手係大陸訂膽、訂電容義不容辭,又借埋自己既私火出黎俾人試,竟然俾我識到 d 咁好既人,真係呢......亦係因為買左呢部膽機,我係中華業餘無線電研究會報讀左初級電子實習班,同埋會一路讀落去,一定要學識自己砌膽機!