31.1.05

Dexter Gordon 巴黎錄音

九龍灣 A&B 爵士部時不時都有筍野執,呢排又以 $68 推緊一批 Blue Note Record 既正野,我買左呢隻 Dexter Gordon 既《Our Man in Paris》,1963年 5月響巴黎既錄音,經過 remaster 後既音色好靚,有碟評話 Dexter 有少許 John Coltrane 既影子咁話,我唔識呀,最有影子既咪係大家都係吹色士風囉,哈。全碟只係有四樣樂器,Bud Powell 彈鋼琴、Kenny Clarke 打鼓,加埋法國低音大提琴手 Pierre Michelot,伴著 Dexter 既色士風,促成左呢隻法國錄音極品。

【爵士 + EL84 單端 = 美妙】

兩齣戲

上星期睇左兩齣戲,《海南雞飯》同《誘心人》。《海南雞飯》略嫌唔夠緊湊,但你要我講乜野叫緊湊我又講唔出,題材都幾得意,但營造唔到令人投入既氣氛,好多位都令我覺得係度睇緊戲,唔算精采,唔睇無損失。

《誘心人》既故事亦都係怪怪地,原來係改編自1997年上演的英國同名舞台劇,由經典電影《畢業生》既金像名導米克尼高斯執導,feel 到佢想將每個人內心深處一 d 埋響道德之下既獸慾反晒出黎俾你睇,可能我保守啦,寫到同拍到呢 d 題材有乜咁叻姐?唔明點解部戲咁 hit,仲羅到《金球獎》男女配角,或者因為我唔係洋人啦。

24.1.05

Joe Henderson

最近每日都會聽一次這張 Joe Henderson 既《Lush Life: The Music of Billy Strayhorn 》,這也是我手上唯一的 Joe Henderson 唱片。我已經忘了是何時及在哪裡買的,當時應該我亂買爵士碟的時期,總之見到係爵士碟就買。這張 CD 已封塵了好一段時間,最近才拿出來聽,嘩!好靚聲,好鬼好聽。Wynton Marsalis 吹小號、Stephen Scott 彈鋼琴、Christian McBride 彈低音結他、Gregory Hutchinson 打鼓,我只是聽過 Wynton Marsalis 這名字,其他一概不認識,真失禮。為何每日都聽?正是因為靚聲和好聽囉。


Wynton Marsalis 去年年推出的《The Magic Hour》亦十分不錯:

21.1.05

跳火

今早其中一支 Tungsram EL84 有跳火現象。一開機已經聽到兩下爆炸聲,我試將 volume 快速由 9 點扭到 3 點,其中一支 Tungsram 就放了一下煙火。這對管子 bid 回來的時後是 NOS 噢,不是那麼快要仙遊吧?

20.1.05

流感熱

真係全城玩緊火熱流感啦啦啦,公司起碼有五成同事「kee kee kur kur、see see suit suit」,街度既人亦然。

今朝搭巴士返工,成架冷氣巴士既人都有病。我坐樓上最前排左邊,後面有個阿叔既喉嚨勁唔妥,搭左一個站,右邊坐低坐個拿住信報既西裝友,巴士起動後佢就黎料,喉嚨果 d 好結既已經係度跳動,講多兩句就開始勁咳,我已經想即刻起身落樓下,但係礙於怕樣衰,終於忍到過左隧道先扮落車起身落樓下。

落到樓下坐低唔夠兩分鐘,前面既女士又咳,我頂!聽日開始真係要帶口罩出街先得喇...

19.1.05

最終又係唔夠人Bid

舍下



機仔


膽一盒


貓一隻

大檸樂!

話唔 bid 唔 bid,又 bid 左部同而家用緊部一模一樣既 Motorola console amp 添,呢部既 condition 比我手上既好好多,無改過,而且連埋個前級仔同所有膽,end bid 只係 US$38.22!!運費仲貴過部機,但係加埋都只係七舊水港紙,買番黎做下實驗都好抵丫!

死喇呢次,實聽扭耳仔喇,大檸樂!

18.1.05

不同管子放在不同線路會有不同表現

小弟沒多少米,但又喜愛靚聲音響,眼見其他網友頻頻換新玩具,的確很羨慕。但一來水源極有限,二來家裡地方淺窄,所以不可隨心所欲地買機。

這幾個月的 DIY 真空管機的歲月裡,漸漸 develop 了自己一套對音響的方向,就是要先實驗多些線路,像相同的 power tube,要盡量試用不同的推動線路和推動管,感受當中的分別。我也知道古董 NOS 和低價中國、俄製管子有差天共地的效果,但沒法子啦,窮人嘛,玩線路是用最有限金錢得到最大滿足感的唯一方法。

還有,經驗亦告訴我,不同管子放在不同線路會有不同表現。

我早前那台中國梁氏 KT88 推挽機子,電壓放大級為 6dj8 SRPP,當時用過 cheap cheap 的 Sovtek 6922,感覺是高低頻申延都不好,聽了兩下就將兩支 Sovtek 收回在盒子裡,接著用 RCA 的 6dj8,效果比 Sovtek 好,心裡面就下了個定論:「RCA 6dj8 的聲音比 Sovtek 6922 好!」後來從 eBay bid 回來的 Motorla EL84 也是用 6dj8,再用 RCA 6dj8 和 Sovtek 6922 作比較,結果是將前面的結論徹底推翻,Sovtek 要高有高、要低有低,中頻更是懾人;再聽 RCA 6dj8,感覺也不錯,但還是被 Sovtek 6922 全面擊倒。原來,不同管子放在不同線路真的會有不同表現!

所以,目前盡量先不買天價的 NOS,先玩線路哩!

17.1.05

Sidebar 更新了

呢 d 係我由去年三月開始認真接觸真空管後睇過的網站,好多都幾值得參考。

16.1.05

三張最新購入DVD



《十一團火》- AT17



AT17 係近期小弟既致愛,尤其鐘意 Ellen 手結他。之前已經買左隻 CD 版,點知又出 DVD 喎,頂!

《Mind, Body & Soul Sessions》- Joss Stone



舊年鼓手阿成已向我推薦 Joss Stone,當時亦響 HMV 試聽過,覺得「幾 groovy 丫...」,但係就無衝動掏腰包買。今次買呢隻 DVD,純粹因為有畫面睇同埋價錢平,$108 有 live 睇,十分抵喇卦。呢位十靚歲英倫北白人妹妹確係唱到黑人騷靈味,加埋幫佢彈野果班音樂人十分紮實,都值得睇下架。

《Live at the Montreal Jazz Festival》- Diana Krall



Hi-fi 論壇中有好多發燒友勁讚 Diana Krall,我亦響 HMV 聽過佢既 CD,但係始終都覺得無舊一脫名伶果 d 味,例如 Billie Holiday、Sarah Vaughan、Ella Fitzgerald、Carmen McRae 果 d 真係後無來者。不過有係因為百鬆 d 蚊就有 live 睇,而且仲係爵士界最堅既 Montreal Jazz Festival 喎,買得過!一開場 Diana 四下 count-in 後即刻俾佢嚇親,嘩!乜佢手琴真係咁出色,女中豪傑!坦白講佢 d 歌小弟仲未係好識聽,但係技術真係勁到無野講。